Roedd rhedwyr yn anelu at aur yn ras 10k Bae Abertawe Admiral eleni. Roedd y digwyddiad yn fôr o aur a du gan fod y lliwiau ar gyfer ras eleni’n helpu i nodi pen-blwydd aur y ddinas.
Mark Kennedy a Gayle Hughes o Landeilo Ferwallt oedd enillwyr lwcus ein cystadleuaeth Tocynnau Aur Abertawe 50.
Un ogystal ag ennill mynediad am ddim i’r ras, roedd Mark a Gayle hefyd yn gwisgo’n bibiau ras arbennig â’r rhifau 1969 a 2019 i goffáu dyddiadau hanner canmlwyddiant y ddinas.
Ymunon nhw â miloedd o redwyr ar gyfer un o’r digwyddiadau gorau o’i fath yn y DU sy’n denu cefnogwyr a chystadleuwyr o bob cwr o’r DU. Dyma’r ras 10k orau yng Nghymru yn ôl Gwobrau Rhedeg 2019.
Meddai’r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, “Roedd yn fraint i’n dinas groesawu cynifer o redwyr brwd y penwythnos hwn; ffordd arbennig arall i Abertawe ddathlu ei 50 mlynedd gyntaf fel dinas.
“Mae cwrs 10k Bae Abertawe Admiral yn un gwych sy’n addas i redwyr, gyda rhai o’r golygfeydd mwyaf bendigedig yn unrhyw le yn y DU – mae’n ddathliad o’n diwylliant chwaraeon.”
Enillwyd y medalau aur eleni gan Kieran Clements o Shaftesbury Barnet Harriers gogledd Llundain yn y brif ras 10k.
Natasha Cockram, o dîm rasio Micky Morris oedd y fenyw gyntaf o Gymru i ennill y 10k ers dechrau’r 1980au.
Enillydd y ras i bobl mewn cadair olwyn am y bedwaredd flwyddyn yn olynol oedd Richie Powell, Chwaraeon Anabledd Cymru.