Gwahoddir rhedwyr i gofrestru ar gyfer ras 10K Bae Abertawe Admiral a fydd ar thema’r 80au.

Yn dilyn y cyhoeddiad mwyaf diweddar gan Lywodraeth Cymru ynghylch digwyddiadau awyr agored, mae Cyngor Abertawe yn falch o allu parhau i gynllunio ar gyfer ras 10k Bae Abertawe Admiral eleni a gynhelir ddydd Sul 19 Medi.

Fel yr holl ddigwyddiadau rhedeg yng Nghymru, gohiriwyd ras y llynedd o ganlyniad i bandemig COVID-19. Mae digwyddiad eleni’n mynd i fod yn un arbennig iawn gan y bydd yn nodi’r 40fed tro i’r ras boblogaidd hon ar hyd cwrs gwastad a hynod olygfaol gael ei chynnal.

Ers ei ddechreuad ym 1981, mae’r digwyddiad wedi ennill gwobrau niferus yn gyson, ac mae Cyngor Abertawe yn cynllunio i ddathlu’r pen-blwydd arbennig hwn. Bydd digwyddiad eleni’n ymwneud â dathlu’r 40fed ras a degawd bythgofiadwy’r 1980au – meddyliwch am gynheswyr coesau, bandiau chwys, gwallt mawr a lliwiau llachar!

Os ydych chi’n ystyried dechrau rhedeg ffordd unwaith eto, neu os ydych chi a’ch ffrindiau am redeg yn gwisgo gwisg ffansi, ymunwch â’r hwyl a chofrestrwch ar-lein heddiw. Cofiwch wrando ar faledi pwerus yr 80au wrth i chi hyfforddi!

P’un a’i hon yw eich ras 10k Bae Abertawe gyntaf neu’ch 40fed tro, edrychwn ymlaen at eich gweld wrth y llinell gychwyn.

Mwy o wybodaeth a cofrestrwch ar-lein

Sicrhawyd lleoedd i’r rheini a gofrestrodd ar gyfer digwyddiad 2020 yn awtomatig ar gyfer digwyddiad dathliadol eleni.

Cofrestrwch gyda hyder

Bydd Tîm Digwyddiadau’r cyngor yn parhau i fonitro sefyllfa’r pandemig yn agos. Cynhelir y ras yn unol â rheoliadau a chanllawiau Llywodraeth Cymru, Iechyd Cyhoeddus Cymru ac Athletau’r DU sy’n berthnasol ar y pryd. Mae cynlluniau’n cael eu datblygu a’u hadolygu wrth i wybodaeth a chanllawiau newydd gael eu cyhoeddi a gallai hyn gynnwys newidiadau a mesurau ychwanegol i sicrhau bod y digwyddiad yn ddiogel i bawb a fydd yn cymryd rhan, gan gynnwys y gymuned leol ehangach.

Bydd yr holl randdeiliaid, swyddogion, gwirfoddolwyr a chyflenwyr perthnasol y digwyddiad, h.y. pawb sy’n cymryd rhan, yn ymrwymedig i gynnal digwyddiad diogel o ran COVID-19 yn unol â’r rheoliadau perthnasol ar y pryd. Rydym yn gobeithio y byddwch yn ymuno â ni i sicrhau ei fod yn ddigwyddiad diogel a llwyddiannus.

Cychwynnwyd y ras gan Gyngor Abertawe ym 1981 ac mae wedi parhau i’w threfnu ers hynny – gan sicrhau ei bod wedi’i gwreiddio’n gadarn yn rhaglen ddigwyddiadau flynyddol Abertawe. Dyma fydd y 15fed achlysur hefyd i gwmni Admiral noddi’r digwyddiad, sydd yn ogystal â’r 10k yn cynnig rasys hwyl iau 1K a 3K, ynghyd â ras 10k i bobl mewn cadair olwyn a ras masgotiaid.

Meddai Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, “Mae ras 10k Bae Abertawe Admiral yn ddigwyddiad gwych i athletwyr elît, pobl sy’n codi arian ar gyfer elusennau a’r rheini sy’n ceisio curo’u hamser gorau neu drechu nodau ffitrwydd.

“Mae’r digwyddiad hwn a gynhelir ar gwrs gwastad a chyda bae hyfryd Abertawe yn gefndir iddo, yn un nodedig yn y calendr rhedeg ac mae’n denu cyfranogwyr o bob cwr o’r DU. Mae’n nodwedd boblogaidd iawn o galendr digwyddiadau blynyddol Abertawe.

“O gofio bod cynifer o rasys wedi’u canslo dros y flwyddyn a hanner diwethaf, ac mai dyma’n 40fed digwyddiad, rydym yn rhagweld y bydd y galw am leoedd yn uchel. Byddem felly’n annog unrhyw un sydd â diddordeb i gofrestru cyn gynted â phosib er mwyn osgoi cael ei siomi oherwydd unwaith y bydd y lleoedd ar gyfer y ras wedi’u llenwi, ni fydd rhagor ar gael!”

Meddai Rhian Langham, Pennaeth Gwasanaethau Pobl Admiral, “Rydym yn falch o barhau i noddi ras 10k a rasys hwyl Bae Abertawe Admiral am y 15fed flwyddyn. Mae cefnogi diwyddiadau yn ein cymuned leol yn rhan fawr o’n diwylliant yma yn Admiral felly mae’n wych bod yn rhan o ddigwyddiad fel hyn, yn enwedig ar ôl blwyddyn heriol. Hoffwn achub ar y cyfle hwn, ar ran pawb yn Admiral, i ddymuno pob lwc i’r holl redwyr.”

Gwahoddir rhedwyr i gofrestru ar gyfer ras 10K Bae Abertawe Admiral 2020.

Gallwch gyflwyno cais heddiw (TBC) a bydd prisiau cynnar am gofrestru tan ddiwedd mis Chwefror.

Mae’r digwyddiad arobryn – sy’n cynnwys rhai o’r golygfeydd gorau ym maes athletau ar hyd y ffordd – wedi cael ei enwebu unwaith eto ar gyfer gwobr Ras 10k orau’r DU yng Ngwobrau Rhedeg 2020.

Cyngor Abertawe sy’n cynnal y digwyddiad, ac mae’n cael ei noddi gan Admiral am y bymthegfed flwyddyn yn olynol. Yn ogystal â’r ras 10k, bydd rasys iau 1k, 3k a 5k ynghyd â ras 10k mewn cadair olwyn.

Disgwylir i oddeutu 5,000 o bobl gymryd rhan ar ddydd Sul 20 Medi, sef 40^fed ras 10k Bae Abertawe. Mae’r ras wedi mynd o nerth i nerth ers ei sefydlu ym 1981 ac mae’r cyngor yn bwriadu dathlu’r pen-blwydd arbennig hwn.

Meddai Robert Francis-Davies, Aelod Cabinet y Cyngor dros Fuddsoddi, Adfywio a Thwristiaeth, “Mae ras 10k Bae Abertawe Admiral yn wych ar gyfer athletwyr ar lefel elît, pobl sy’n codi arian ar gyfer elusennau a’r rheini sy’n ceisio curo’ch amser gorau neu drechu’ch nodau ffitrwydd.

“Gyda chefndir bae hyfryd Abertawe ar gwrs gwastad, mae’r digwyddiad yn un nodedig yn y calendr rhedeg ac mae’n denu cyfranogwyr o bob cwr o’r DU. Mae’n nodwedd boblogaidd iawn o galendr digwyddiadau blynyddol Abertawe.

“Byddem yn annog unrhyw un sydd â diddordeb i gofrestru cyn gynted â phosib er mwyn osgoi cael eich siomi oherwydd unwaith y bydd y lleoedd ar gyfer y ras wedi’u gwerthu, ni fydd rhagor ohonynt.

“Mae’r digwyddiad yn parhau i dderbyn adborth cadarnhaol bob blwyddyn gan gyfranogwyr o’r gorffennol sy’n clodfori safon trefnu’r ras, a’r gefnogaeth maent yn ei derbyn o’r cannoedd o bobl sy’n cefnogi ar hyd y llwybr.”

Bydd prisiau cynnar am gofrestru ar gael tan 29 Chwefror. Ewch i swanseabay10k.com i fanteisio ar y cyfle. Bydd y ffi safonol yn berthnasol o 1 Mawrth.

Bydd yr RNLI ac Ambiwlans Awyr Cymru ymysg yr elusennau a fydd yn cael sylw yn ystod ras masgotiaid flynyddol 10k Bae Abertawe Admiral y mis hwn.

Bydd Pride Abertawe, Y Gweilch yn y Gymuned, Cash for Kids, elusennau’r Arglwydd Faer a Swans Aid yno hefyd.

A nawr, gydag oddeutu pythefnos i fynd tan y ras fawr, mae’r masgotiaid a fydd yn cymryd rhan yn hyfforddi ar gyfer y foment fawr ddydd Sul, 22 Medi.

Bydd y ras 100m yn dechrau am 11.10am y tu allan i faes San Helen – sef 10 munud ar ôl i’r brif ras ddechrau o’r un lleoliad.

Cyngor Abertawe sy’n trefnu ras 10k Bae Abertawe Admiral, sydd hefyd yn cynnwys rasys 1k a 3k i  blant iau.

Dylai unrhyw grŵp, elusen, sefydliad neu gwmni sydd am i’w masgot gymryd rhan yn y ras 100m – a chael cyfle i ennill y £100 sydd ar gael yn wobr i’r masgot buddugol – e-bostio Lindsay Sleeman neu ei ffonio ar 01792 635428.