Tair wythnos yn unig sydd ar ôl i bobl sy’n dwlu ar ffitrwydd a chodi arian i elusennau gyflwyno’u ceisiadau ar gyfer 10k Bae Abertawe Admiral eleni.

Eich cyfle olaf i gofrestru ar gyfer y ras flynyddol, a gynhelir ddydd Sul 16 Medi, yw dydd Gwener 31 Awst.

Cyngor Abertawe sy’n gyfrifol am y digwyddiad sy’n cael ei noddi gan Admiral am y drydedd flwyddyn ar ddeg yn olynol. Yn ogystal â’r 10k, bydd rasys iau 1k, 3k a 5k hefyd, yn ogystal â ras 10k mewn cadair olwyn.

Disgwylir i tua 5,000 o bobl gymryd rhan unwaith eto eleni.

Meddai’r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, “Gyda chynifer o olygfeydd prydferth nid yw’n syndod bod rhedeg yn rhan o ddiwylliant cyfoethog ein dinas.

“Yn gynharach eleni enwyd 10k Bae Abertawe Admiral fel ras 10k orau Cymru yng Ngwobrau Rhedeg 2018, ac enwebwyd y ras yng Ngwobrau Rhedeg 2019 hefyd.”

Meddai’r Cyng. Francis-Davies, “Mae Ras 10k Bae Abertawe Admiral, sy’n un o ddigwyddiadau mwyaf poblogaidd y flwyddyn yn Abertawe, yn ras wych i athletwyr profiadol, pobl sy’n codi arian ar gyfer elusennau a phobl sydd am guro eu hamseroedd gorau neu drechu nodau ffitrwydd personol.

“Gyda golygfeydd prydferth Bae Abertawe yn gefndir i’r ras wastad, mae’r digwyddiad arobryn hwn hefyd yn cynnwys rasys i blant sy’n rhoi cyflwyniad perffaith i redeg ar y ffordd iddynt.

“Gyda’r dyddiad cau ar gyfer cofrestru ar ddiwedd mis Awst, byddwn yn annog unrhyw un sydd â diddordeb yn y digwyddiad eleni i gofrestru cyn gynted â phosib er mwyn osgoi cael ei siomi gan fod y ras bob amser yn llawn, yn aml cyn y dyddiad cau.

“Mae’r bobl sy’n cymryd rhan yn y ras bob amser yn gadarnhaol iawn am y profiad oherwydd y ffordd y caiff ei threfnu a’i rheoli, heb anghofio am y gefnogaeth maent yn ei derbyn gan y cannoedd o bobl sy’n dod i gefnogi ar hyd y llwybr.”

Cynhelir ras fasgotiaid ar y diwrnod hefyd, felly croesewir pobl sydd am gofrestru fel rhan o grwpiau, sefydliadau a chwmnïau mewn ymdrech i ennill y £100 sydd ar gael i’r masgot buddugol.

Mae cannoedd o redwyr iau’n paratoi ar gyfer 10k Bae Abertawe Admiral arobryn eleni.

Mae’n amser i gofrestru ar gyfer y rasys iau sy’n hynod boblogaidd ac sy’n cynnwys pellterau gwahanol i’r rhai sydd yn y prif ddigwyddiad ar gyfer oedolion.

Bydd pobl ifanc sydd wedi cofrestru erbyn mis Awst yn derbyn crys-t ar gyfer y ras ynghyd a medal, tystysgrif a bag rhoddion ar ôl iddynt groesi’r llinell derfyn.

Mae cannoedd o bobl eisoes wedi cofrestru ar gyfer y brif ras a bydd y digwyddiad iau yn herio pobl ifanc yn y rasys 1k, 3k neu 5k, gan ddibynnu ar eu grŵp oedran.

Meddai’r Cynghorydd Robert Francis-Davies, Aelod y Cabinet dros Arloesedd, Adfywio a Thwristiaeth, “Mae 10k Bae Abertawe Admiral yn un o drysorau rhaglen ddigwyddiadau flynyddol y ddinas, ac mae’r nifer o bobl ifanc sy’n cymryd rhan neu’n dod i wylio’n cynyddu bob blwyddyn.

“Dewiswyd 10k Bae Abertawe Admiral fel y ras 10k orau yng Nghymru yng ngwobrau rhedeg 2018 ac rydym yn falch o’r teitl hwn sy’n dilyn pleidlais rhedwyr sydd wedi cymryd rhan yn y ras eu hunain oherwydd ei fod yn adlewyrchu safon y digwyddiad.

“Mae’r wobr hon yn profi bod hwn yn ddigwyddiad sy’n hynod boblogaidd ac mae digon o amser ar ôl i chi ymarfer cyn y diwrnod mawr ar 16 Medi, p’un a ydych yn rhedwr iau neu’n oedolyn.”

Cymerodd mwy na 4,500 o bobl ran yn y ras y llynedd. Yn ogystal â’r brif ras, sef y 10k, bu rasys iau 1k, 3k a 5k yn ogystal â ras gadair olwyn 10k a sbrint 100 metr i fasgotiaid.

O ganlyniad i recordio amserau electronig, bydd cystadleuwyr yn cael gwybod yn gyflym ac yn hawdd a oedd eu hymdrechion yn ddigon i guro eu hamser personol gorau ar gwrs sy’n hwylus i redwyr ac sy’n cynnig rhai o’r golygfeydd godidocaf yn y wlad.

Gallwch gofrestru yn awr ar gyfer y rasys iau sy’n cynnwys ras 1k ar gyfer plant 11 oed ac iau, ras 3k ar gyfer plant rhwng 9 a 14 oed a ras 5k ar gyfer pobl ifanc rhwng 15 a 21 oed. Pris cynnar i gofrestru am y ras yw £6.50 ond bydd y pris yn cynyddu ar 1 Gorffennaf felly brysiwch!

Roedd darpar gyfranogwyr yn gallu cofrestru ar gyfer y brif ras yn syth ar ôl i’r digwyddiad orffen y llynedd a’r pris cynnar i gofrestru yw £22 ar gyfer rhedwyr sy’n aelodau a £24 ar gyfer rhedwyr nad ydynt yn aelodau. Bydd y cynnig cynnar ar gyfer y brif ras yn dod i ben ar 11 Mehefin.

Os rydych eisiau cymryd rhan yn y rasys iau neu’r brif ras 10k, mae’n rhaid i chi gofrestru cyn 31 Awst neu cyn bydd yr holl leoedd yn llawn – mae’r holl leoedd wedi bod yn llawn cyn y dyddiad cau dros y blynyddoedd diweddar felly cofrestrwch yn gynnar i osgoi cael eich siomi.